اضيفى النكهات لطعامك بدون سعرات حرارية

اثناء الرجيم بنزهق من تكرار الاكل وطعمة المتشابه لانه مسلوق او مشوى وبتكون النتيجه اننا بنسيب الرجيم، ممكن تضيفى حاجات بسيطه على الاكل تضيفله نكهات جديدة وفى نفس الوقت ملهاش سعرات حرارية وبكده تكونى حافظتى على نظامك الغذائى، وحتى لو مش بتعملى رجيم الاضافات دى هتكون احسن من الصلصات المختلفة الى بنشتريها جاهزة:
-خل التفاح: ليه فوايد كتير زى تقليل الكوليسترول وبيحارب السرطان وطعمه قوى ممكن يغنيكى عن اضافة ملح للأكل، حطيه على السلطه وهتلاحظى تغيير فى طعمها.
-الفلفل الاسود: ضيفيه على الفراخ واللحمة المشوية والخضار المسلوق.
-الخردل: ممكن تضيفيه على اللحوم والخضروات ولكن خلى بالك ان فيه نسبة ملح عالية يعنى لو استخدمتيه قللى الملح خالص.
اعشاب مختلفة: زى البردقوش والينسون والزعتر والريحان والنعناع بالاضافة للكارى، اختارى منهم النكهة الى بتفضليها وممكن تضيفى كذا حاجه مع بعض هيدوكى طعم مختلف وجديد.

تنسيق الحقائب النيون مع الملابس بالصور

الحقائب النيون موضة رائجة جدا فى هذا الموسم وبتضفى على مظهرك لمسة حيوية ومظهر مميز حتى لو كانت الملابس بسيطة، لكن قبل ما تشترى حقيبة بلون النيون لازم تعرفى الاول ازاى تنسقيها مع لبسك وتلبسيها مع ايه:

- ممكن تلبسى الحقيبة النيون اذا كان لبسك داخل فيه نفس اللون

-ممكن كمان تلبسيها مع الاقمشة المطبعة سواء كان فستان او بلوزة

-ومع الابيض والاسود هيكون اضافة مميزة جدا سواء كان اللبس مقلم او سادة

-مع الالوان الباستيل

اتيكيت الهدايا

الهدايا من الاشياء الجميلة التى تقرب الافراد من بعضهم وتعتبر من قواعد المجاملات وتقدم فى جميع المناسبات ولكل الأعمارولكن يجب ان تتعلمى بعض القواعد الخاصة بالهدايا وهى :
-لا تختارى الهدية حسب ذوقك انتى بل اختاريها حسب ذوق المهدى اليه.
-لا تهدى هدية لا يستطيع ان يردها بما يعادلها حتى لا تشعريه بالاحراج.
-لا تهدى عطورا حتى تتأكدى من ذوق المهدى اليه فى احتيار العطور.
- لا تنسى محو الثمن من على الهدية ولا تتحدثى امام المهدى اليه عن جمالها او عراقتها او انها غالية الثمن.
- لا تقدمى هدية فورية لشخص اهدى لك هدية او قدم اليكى معروفا وانتظرى الوقت المناسب.
متى تقدم الهدايا؟
فى اعياد الميلاد،قبل حفلات الزواج بأسبوع او شهر او بعد العوده من شهر العسل، عند زيارة شخص ما عندما يدعوك للعشاء او الغذاء من اللائق ان تقدمى هدية بسيطة مثل الشيكولاتة او الجاتو، اثناء زيارة المرضى وهناك مناسبات اخرى ولكن تقديم الهدايا فيها يكون اختيارى حسب درجة قربك من الشخص مثل: النجاح، الترقى الوظيفى، شراء سيارة او بيت جديد.
نقود ام هدية عينية؟
احيانا تكون النقود افيد خصوصا فى مناسبات الزواج والمولود الجديد واعياد الميلاد ولكن يجب ان تقدميها فى ظرف مغلق.
سلوك من يتلقى الهدية:
يجب ان تشكرى فورا من قدم لكى هدية وافتحيها امامه فى الحال وابدى اعجابك بها واشكريه مرة اخرى حتى لو لم تكن الهدية تروق لكى كثيرا، يكفى احساسك بأن هذا الشخص خصص جزء من وقته ونقوده لكى ولا يجوز ابدا ان تقولى جمل محبطه مثل : انا لا احب هذا العطر او لا استخدم هذا النوع من المكياج، الخ.
ولكن اذا كان هناك اكثر من شخص فلا تفتحى الهدايا امامهم فقط اشكريهم ثم افتحيها بمفردك واشكريهم مرة اخرى فالتليفون وابدى اعجابك بالهدية، لانك اذا فتحتى الهدايا امام الجميع ربما تتسببى فى احراج احدهم لبساطة هديته بمقارنتها مع باقى الهدايا.
اذا قدم لكى احدهم الزهور قومى على الفور بوضعها فى الفازة ولا تتركيها جانبا حتى يرحل.
اذا ارسلت لكى هدية اتصلى بالشخص واشكريه وطمئنيه على وصولها.
الهدية لا تهدى:
لا ينبغى ان تهدى الهدايا الخاصة بكى لأشخاص أخرين  وخصوصا اذا كان هناك فرصة ليعرفوا ذلك، لانك بهذا الأسلوب تحقرين من شأن الهدية ومن اهداها لكى، وضعى نفسك مكانه وتخيلى ما ستشعرين به اذا اهديتى هدية لشخص ما واكتشفتى انه اهداها لشخص اخر او اعطاها له دون اى اكتراث لكى.

اعملى الباديكيير لوحدك فى البيت

الباديكيير من الحاجات المهمة اللى لازم تواظبى عليها فى روتينك الاسبوعى، وفائدته انه بيزيل الجلد الميت وبيطرى الجلد ويخلى اظافرك لامعه ونظيفة، ومش لازم عشان تعمليه تروحى لبيوتى سنتر لانه سهل جدا ومش مكلف وطريقته هى كالآتى:
-لو حاطه مانيكيير شيليه بالاسيتون ويفضل تضيفى عليه قطرات من الجلسرين عشان الاظافر متنشفش، وشيليه بقطن مش مناديل لانه انعم.
-قصى اظافرك بالقصافة بالشكل المفضل ليكى وابرديها بمبرد رملى ولا يفضل ابدا المبرد المعدنى، وابرديها فى اتجاه واحد مش رايح جاى عشان الاظافر متتكسرش.
-استخدمى البافر: المنطقة الغامقة فى اتجاه واحد والمنطقة الفاتحه رايح جاى عشان تشيل التعرجات من الظفر وتخليه لامع جدا.
-انقعى رجليكى او اديكى فى مية دافية مضاف ليها زيت لوز حلو حوالى 10 دقائق.
- طلعى رجليكى من المية وصنفرى الجلد سواء بصنفرة جاهزة او اعمليها انتى من السكر وقطرات من زيت الزيتون و عصير الليمون.
-ادعكى رجليكى بالحجر واظافرك بفرشاة اسنان قديمة لان جلد اليدين مش هيستحمل الحجروبعد كده اشطفى رجليكى ولو عندك مزيل الحواف هيكون افضل وبلاش تحاولى تشيلى الجلد الزايد ده بالقصافة لان مش اى حد بيعرف وممكن يعورك جامده، ولو مش عندك مزيل الحواف حاولى تزقى الجلد ده لجوة وبلاش تشيليه.
اخر خطوة ادهنى رجليكى بالكريم، لكن لو هتحطى مانيكيير يبقى حطيه الاول وبعد ما ينشف حطى الكريم الى انتى عايزاه .

ازاى تعملى body mist فى البيت

سبراى الجسم او body mist او body splash ده عبارة عن سبراى معطر بنرشه على الجلد نفسه مش على الملابس زى البارفان ولكن ريحته بتكون خفيفه جدا وبتروح بسرعه والفايده منه انه بيديكى احساس بالأنتعاش وخصوصا انك بترشيه على الجلد نفسه وبيكون داخل فى تركيبه مواد مرطبه للجلد بتخليه ناعم ومش بيسبب اى حساسية زى البارفان لو اترش على الجلد، المواد دى زى الجلسرين والالوفيرا وبعض الزيوت الطبيعية المرطبة، وطبعا بيكون سعره اقل من البارفان لان تركيز الزيت العطرى فيه خفيف جدا لا يذكر مقارنة بالبارفان العادى، عشان كده لازم تكونى عارفه قبل ما تشتريه انه الريحة مش هتدوم فترة طويلة.
طريقة السبراى ده سهلة جدا وممكن تعمليها لوحدك وطبعا هيكون ارخص بكتير من الجاهز، ومكوناته هى:
بخاخه فارغه نظيفة-جلسرين-زيت عطرى-ماء مقطر
هتفضى الماء المقطر فى البخاخه وتضيفى عليه ملعقة كبيرة جلسرين او 2 حسب حجم البخاخه او حسب احتياجك للترطيب، وتضيفى قطرات من الزيت العطرى المفضل لديكى وهتلاقى عند العطار زيوت كتير جدا زى الفل والياسمين والبرتقال والفراولة وممكن لو فى بارفان معين بتحبيه، روحى لمحلات تركيب العطور واطلبى منه زيت البارفان ده واكدى عليه انه ميضفش عليه اى حاجه، هيديكى زجاجة صغيرة جدا ومتسغربيش لان ده الزيت الخام الى هو بيزوده عشان يركب منه العطور المختلفة. وطبعا يفضل ان الزيت العطرى يكون خفيف ومنعش عشان كده بنصح بزيوت الفواكه زى الخوخ مثلا وضيفى قطرات فقط لان الزيوت دى مركزة جدا، اقفلى البخاخة ورجيها قبل كل استخدام.
* لو حابة تخلى السبراى glittery هاتى eye shadow دهبى وكسرى قطعه صغيرة جدا وحطيها جوة البخاخة ورجيها او لو عندك بودرة هيكون افضل.

اتيكيت دورات المياه

ناس كتير ممكن تستغرب من العنوان وتسأل هى دورة المياه كمان ليها اتيكيت؟! ايوة طبعا لان الاتيكيت لا يقتصر على التعامل مع الافراد، لكن بيشمل طريقة تصرفنا مع الاشياء وفى الاماكن المختلفة، هى كلها خطوات بسيطه واكيد اغلبنا عارفها لكن ممكن حد ميخدش باله او ينسى، كمان مهم جدا اننا نعلم ولادنا الحاجات دى من صغرهم عشان يتعودوا عليها.
اولا بعد ما نستخدم الصابونة لازم نسيبها بتلمع مش مليانة رغاوى وشكلها وحش، وطبعا لو انتى بايتة عند حد من قرايبك مثلا لازم يكون معاكى ادواتك الخاصة ولو استخدمتى حاجه زى معجنون الاسنان مثلا او شاور جيل لازم تقفلى العبوة كويس وتحطيها فى مكانها بالظبط وقبل ما تطلعى لازم تتأكدى ان الارضية ناشفة عشان المنظر العام وعشان الى يدخل بعدك ميتزحلقش.
-اتأكدى ان الحنفية مقفولة كويس، وطبعا اتأكدى من شد السيفون بعد قضاء الحاجة واستخدمى معطر جو لو موجود، او خلى معاكى زجاجة بيرفيوم صغيرة ورشى منها كام رشه فى الهوا ولو فى شفاط افتحيه واستنى كام دقيقة وبعد كده اخرجى.
لو انتى فى مطعم او مول مثلا اختارى الحوض البعيد وميكنش جمبه المجفف او سلة المهملات عشان الى داخلة والى طالعه متخبطش فيكى وكذلك المرحاض ادخلى اخر واحد ولو لقيتى المراحيض كلها مشغولة متخبطيش على الناس اكتر من مرة واحدة فقط، وخلى معاكى مناديل عشان لو خلصت مثلا والعاملة نسيت تحط تانى، ويفضل انك تستخدمى الغطاء البلاستيكى الخاص بالمرحاض حرصا على صحتك، وطبعا بعد ما تخلصى ترمية فى القمامه هو او المناديل ومينفعش تسيبى حاجه فى الارض او ترمى حاجه فى المرحاض نفسه، ومينفعش ابداا الارض يبقى عليها مية او المرحاض لازم قبل ما تخرجى تنشفى المية دى بالمناديل.
لو واقفه عند الحوض ممكن عادى تكلمى الناس اللى معاكى لكن اثناء استخدام المرحاض مش من الذوق ابدا انك تتكلمى مع صاحبتك الى جمبك.واخر حاجه وانتى خارجة ابتسمى لعاملة النظافة لانها هتصلح ما اتلفتيه.
الخلاصة ان لازم اى حد يدخل بعدك يحس ان محدش دخل قبله يعنى ارضية نظيفة ، ريحه حلوة، كل حاجه مترتبة، شوفى انتى تحبى دورة المياة الى تدخليها تكون عاملة ازاى واعملى كده.
اما فى بيتك بقا لازم تهتمى بنظافة الحمام ده اكتر مكان وتفضى على طول سلة القمامة وتتأكدى ان فى مناديل ومفيش مانع انك تحطى شمع معطر مع معطر الجو او تحطى فازة صغيرة فيها ورد لو المكان عندك يسمح او اى حاجه بسيطة تضفى لمسة جمالية.

استخدامات غريبة لطلاء الأظافر

طلاء الأظافر لا يستخدم فقط لتلوين أظافرك، بل يمكنك استخدام هذا المستحضر التجميلى لاضفاء لمسه جمالية على بعض اغراضك، فهو مجرد لون يمكنك استخدامه لتلوين الكثير من الاشياء وتغيير شكلها التقليدى:
1- يمكنك استخدام طلاء الاظافر لتلوين قاعدة مفاتيحك حتى تستطيعى التمييز بينهم بكل سهولة عن طريق اللون وخاصة اذا تشابهت المفاتيح فى سلسلة مفاتيحك، فهذه الفكرة ستوفر عليكى وقت تجربة كل مفتاح حتى تجدى مفتاحك المقصود.

2- يمكنك استخدام الطلاء لتلوين بنس الشعر وتلوين الاكسسوارات المختلفة من خواتم واقراط وعقود ويمكنك استخدام اكثر من لون، بما يليق مع ملابسك المختلفة.

3- يمكنك ايضا الرسم بواسطة فرشاه صغيرة على ملابسك الجينز وتغيير شكلها تماما.

4- ايضا يمكنك استخدام الوان مختلفة من طلاء الاظافر لتلوين حذائك القديم لتحصلى على شكل مختلف تماما وكأنك قمتى بشرائه حديثا.

اتيكيت التعارف

فى اى مكان بنروحه سواء شغل او نادى او حفلة بنقابل ناس جديدة، فى طرقتين للتعارف، اول طريقة ان شخص مشترك بينا يعرفنا احنا الاثنين على بعض او ان الاشخاص الى عايزين يعرفوا بعض يبدأوا يقدموا نفسهم ويتعرفوا.
فى حالة انك مش عارفة الشخص الى قدامك ومفيش حد تعرفوه سوا يعرفكوا ببعض مينفعش تبدأى كلامك بجمل زى اسمك ايه او عرفينى بنفسك، ابدأى انتى الاول وقولى اسمك وعرفيها بنفسك، اما فى الحالة التانية وهى وجود شخص مشترك بينكم، بتكون البداية لتقديم الاهم يعنى بنعرف المرأة الاول ثم الرجل ثم الاطفال فى النهاية.
- يقدم الرجل للمرأة مثال:( مدام فلانة اعرفك بالاستاذ فلان).
-يقدم الشخص الاصغر للشخص الاكبر، مثال:( لو انتى خارجه مع والدك وقابلتى واحده صاحبتك هتقولى :بابا، دى صاحبتى فلانة).
اما فى مجال العمل بيختلف الامر وبتكون الاوليه للاهم حتى لو كان اصغر الموجودين، مثال: لو صاحب الشركة فى الثلاثين من عمره وباقى الموظفين اكبر منه بنبدأ بيه لانه هو الاهم حتى لو كان فى من الموظفين سيدات لان فى مجال العمل مفيش فرق فى السن او بين ذكر او انثى وبيكون التعامل حسب المركز الوظيفى يعنى مثلا صاحب الشركة اسمه A هنقوله استاذ A اقدملك الاستاذه S.
لو انتى اللى بتقدمى الناس لبعض قولى اسمهم كامل مش اول اسم فقط ومينفعش تقولى  عند تقديم حد ، دى صاحبتى فلانة لان الشخص الاخر هيحس انك مش معتبراه من اصدقائك او انكم اغراب عن بعض وده هيجرح شعوره.

اسباب الهالات السوداء وطرق علاجها

منطقة اسفل العين عبارة عن طبقة رقيقة جدا من الجلد لا يوجد تحتها دهون او غدد لذلك فهى افضل منطقة تكشف عن لون الدم، فإذا كان الدم لونه متغير وغامق فهذا دليل على انه مشبع بثانى اكسيد الكربون نظرا لوجود امساك او اى نوع اخر من السموم داخل الجسم، كما يوجد اسباب اخرى لظهور تلك الهالات السوداء، قد يكون عامل وراثى،انخفاض فى ضغط الدم، الاجهاد وقلة ساعات النوم او عدم انتظامها، الاكثار من مستحضرات التجميل، او الانيميا.
لذلك اذا كنتى تعناين من الهالات السوداء عليك اولا معرفة سببها وذلك بعمل تحليل صورة دم كاملة ثم عرضها على طبيب باطنى مختص ليفحص نتيجة التحليل ويعالج اى مشاكل ان وجدت، مع الحرص على النوم ما لا يقل عن 8 ساعات يوميا وعدم السهر والحرص على شرب الكثير من الماء وعدم الجلوس امام التلفاز او الكمبيوتر لفترات طويلة، والابتعاد عن الاجهاد العصبى قدر المستطاع.
هناك العديد من الوصفات الطبيعية التى بإمكانها تخفيف وإزالة الهالات مع الحرص على استخدامها بأنتظام ومنها:
عمل كمادات من شرائح البطاطس او شرائح الخيار،كما يمكنك دهن المنطقة بقليل من زيت اللوز الحلو او زيت الزيتون، عصير الخيار ايضا مفيد جدا ويمكنك عمله بضرب ثمرة خيار فى الخلاط وتصفيته واضافة بعض قطرات عصير الليمون وعمل كمادات بالعصير البارد، اذا اتبعتى احدى تلك الوسائل مرتين يوميا مع تجنب مسببات الهالات السوداء فستلاحظين الفرق فى اقل من شهر.

اتعلمى ازاى تعملى مرطب شفايف فى البيت

من الحاجات الى بنهملها دايما هى ترطيب الشفايف، الى بتعتبر من الاماكن الحساسه جدا فى الجسم وبتتأثر بالشمس والاتربه سريعا، عشان كده لازم نهتم بترطيبها يوميا والحرص على تقشير الجلد الميت عشان نتجنب مشاكل الجفاف وتغيير لون الشفايف.
مكونات المرطب ده سهلة جدا وموجودة كلها عند العطارو هى:معلقة فازلين كبيرة-معلقة عسل ابيض صغيرة-نصف معلقة صغيرة زيت زيتون-نصف معلقة صغيرة زيت جوز هند.
هنحط المكونات دى فى اناء صغير ونحطه فى اناء اكبر فيه ميه بس نخلى بالنا ان المية متجيش على الخليط وده اسمه حمام مائى، بمجرد ما الفازلين يسيح بنرفعه من على النار ونضيف على الخليط ده 2 كبسولة فيتامين E يعنى بنفضيهم وناخد السائل الى جوة الكبسولة وعليهم ربع معلقة صغيرة جلسرين ونصف معلقة صغيرة زيت فراولة عشان المرطب يبقى ريحته جميله وتتشجعى انك تستخدميه، قلبى المكونات مع بعضها كويس وفضيها جوة علبة كريم فاضية عندك وحطيه فى التلاجه 6 ساعات عشان يتجمد كويس وبعد كده ابدئى استخدميه ولو الجو حر وحسيتى انه ساح يبقى الافضل احفظيه فى التلاجه، افضل وقت تستخدمى المرطب ده هو قبل ما تنامى حطى كمية كبيرة واول ما تصحى قشرى شفايفك بفرشة اسنان ناعمة والنتيجه هتلاحظيها من اول استخدام.
ملحوظه مهمة جدا:
ممنوع تستخدمى المرطب ده وتخرجى بيه فى الشمس لان الفازلين والزيوت اما بيتحطوا على الجلد وتتعرضى  للشمس الجلد بيسمر جدا.

اصنعى صابونة القهوة لتقليل الخطوط البيضا والسيلوليت

الصابونة دى مكوناتها متوفرة وطريقة صنعها سهلة جدا ومن فوايدها انها بتقلل الخطوط البيضا والسيلوليت وبتنعم الجلد وكمان فى معلومة بنات كتير متعرفهاش وهى ان البن بيساعد فى تفتيح البشرة، مكونات الصابونة دى هى:
صابونة جلسرين ودى موجوده فى اى صيدلية، 3 معالق كبار بن، 1 معلقة قرنفل مطحون، 1 معلقة زيت قرنفل، 1 معلقة جنزبيل مطحون، 3 معالق مية دافية.
الطريقة هى اننا بنبشر الصابونة ونحطها فى حلة صغيرة او اى اناء معدنى وبنضيف عليها باقى المكونات ونرفعها على نار هادية لحد ما الصابونة تسيح تماما وكل المكونات تختلط ببعضها بعد كده بنرفعها من على النار ونكون مجهزين علبة صغيرة او قالب ومغلفينه من جوة بورق فويل، ونصب فيه الخليط الى عملاناه ونغطيه ونسيبه لحد ما يبرد تماما وبعد كده نشيله فى التلاجه يوم كامل وبعد كده نسيبها فى الهوا يوم تانى عشان نتأكد انها تماسكت تماما وبعد كده بنطلعها من العلبة ونشيل من عليها الورق الفويل ونستخدمها.
طريقة استخدامهابتكون اثناء الاستحمام بماء دافى بنبدأ ندلك الاماكن الى فيها خطوط بيضا او سيلوليت بحركات دائرية ويفضل لو عندنا فرشاة المساج هتكون احلى لو مفيش هندلك بالصابونة وبعدين بايدنيا بحركات دائرية من تحت لفوق ونغسل الجسم بعد كده وفى الاخر لازم نرطب الجلد باى كريم مرطب او لوشن او زيت الاطفال.والصابونة بنشيلها فى اى مكان بعيد عن المية عشان متبوظش بس مش بندخلها التلاجه تانى.

ما هى الخطوط البيضا stretch marks

هى عبارة عن تشققات بتظهر فى اجزاء معينة من الجسم مثل البطن والارداف والفخذين والذراعين والثدى، وبيكون لونها احمر فى البداية ثم بيتحول الى اللون الابيض وهو لون الدهون الموجوده تحت الجلد الى بتظهر بشكل واضح نتيجة التشقق الذى حدث فى الجلد وده بيكون نتيجة لعوامل كثيرة:-
من اكثر الاسباب الشائعه لظهور الخطوط البيضاء هى السمنه المفاجئة او خسارة الوزن بطريقة سريعة وده بيكون عند الناس الى بتتبع انواع حمية غذائية وبتتركها فجأه وترجع تتخن بسرعة، كمان فى فترة المراهقة والنمو السريع اوقات بتحصل نفس المشكلة.
فى فترة الحمل وبعد الولادة بتظهر الخطوط دى فى منطقة البطن نتيجة تمدد الجلد بشكل سريع، كمان بالنسبة للناس الى بتمارس رياضات عنيفة او بترفع اثقال اوقات بيظهر عندها الخطوط دى فى منطقة الصدر والذراعين والفخذين.
ومن اهم الاسباب ايضا هو جفاف الجلد وعدم مرونته بسبب عدم الترطيب وعدم شرب الماء، وعشان نمنع ظهور المشكلة دى لازم نهتم بشرب قدر كافى من الماء يوميا مع استخدام كريمات مرطبة للجسم كله اما فى فترة الحمل والمراهقة نستخدم الكريمات المرطبة التى تحتوى على زبدة الشيا و زبدة الكاكاو زى كريم بالمرز وهو آمن تماما وليس له اى اضرار على الحمل، وكمان ممارسة الرياضة بتمنح الجلد المرونة اللازمة الى بتمنع ظهور المشكلة دى.
اذا كانت الخطوط ظاهرة جدا وشكلها سىء يوجد لها حلول طبية زى الليزر والتقشير الكيميائى والميزوثيرابى.

الأهتمام بالمناطق الحساسة فى الجسم

الأهتمام بنظافة الجسم عامة شىء ضرورى، بما في ذلك المناطق الحساسة والتى بتتطلب عناية فائقة لأن اهمالها بيؤدى لظهور الامراض والبثور والألتهابات الناتجة عن تراكم البكتريا والميكروبات، وهذه المناطق بتشمل تحت الابطين ومنطقة خط البيكينى.
اولا النظافة: طبعا الاماكن دى بتكون مكتومة اغلب الوقت وده ممكن يسبب رطوبة بتؤدى لمشاكل كثيرة، عشان كده لازم نهتم بتنظيف الاماكن دى يوميا باستخدام غسول خاص بالمناطق الحساسة او الصابون المخصص للأطفال ولا يفضل نهائيا استخدام الصابون العادى او الشاور جيل لان فيهم مواد ضارة بتسبب تهيج واحمرار الجلد فى هذه المناطق، وممكن نستخدم لوفة ناعمة جدا عشان تزيل الجلد الميت وممنوع استخدام اى ليفة خشنة فى هذة المناطق نظرا لرقة الجلد، اهم خطوة بعد التنظيف هى تجفيف الجلد لان الرطوبة بتسبب روائح كريهة والتهابات واسمرار.ودايما نستخدم فاتر لان الماء الساخن مضر للجلد فى هذه الأماكن.
ممنوع تستخدمى برفيوم فى هذه المناطق او اى كريمات بتحتوى على كحول لانها بتؤدى لأتهاب الجلد وعوضا عن ذلك نستخدم الكريمات المخصصة للأطفال و وصفات التعطير الطبيعية، وبالنسبة لمزيلات العرق نحاول نقلل استخدامها قدر المستطاع وممكن نستخدم بدلا منها الوصفات الطبيعية المكونة من الشبة والمسك الأبيض.
اما بالنسبة للملابس فيجب ارتداء الملابس القطنية مع الحرص على تغييرها يوميا وتنظيفها، لان الملابس المصنوعه من الالياف الصناعية بتسبب حساسية فى هذه الأماكن ومن الافضل ارتداء شورت طويل لمنع احتكاك الفخذين وحدوث اسمرار فى الجلد.
يجب التخلص من الشعر الزائد فى هذه الاماكن لانه بيسبب تراكم الميكروبات الضارة، مع الحرص على نظافة الجلد من اى كريم او مزيل عرق قبل عملية الإزالة وترطيب الجلد بعد الازالة او يمكنك مسح المنطقة بماء الورد البارد مضاف ليه قليل من النشا، وممنوع استخدام اى مزيل عرق بعد إزالة الشعر مباشرة لمنع حدوث إالتهاب.

اصنعى بنفسك حمام كريم للشعر بالنخاع

النخاع هو مادة موجوده داخل العظام وطبعا احنا بنستخدم عظام البقر او الجاموس، الماده دى بتحتوى على العديد من الفيتامينات والبروتينات الى بتغذى الشعر وبتطريه جدا، وفى انواع حمامات كريم بالنخاع مشهورة زى biopoint، ونقدر نعمله فالبيت بطريقة سهلة جدا ومش هتكلفنا كتير.
هتروحى للجزار وتقوليله عايزة ماسورة وتخليه يكسرها لان صعب تكسريها فالبيت، هتلاقى جوه العظم مادة لونها ابيض وملمسها زى الكريم او الفازلين، هتسيحيها على النار فى حمام مائى يعنى تحطيه فى حاجه معدن وتحطيها جوة حله اكبر فيها ميه بشرط ان الميه متجيش على النخاع، اول ما يسيح اطفى على طول هتلاقيه بقا لونه اصفر وشبه السمن هتصفيه من الشوائب الى فيه وترجعيه على النارتانى فى الحمام المائى وتضيفى عليه زيت زيتون بنفس الكمية وتسخنيهم مع بعض وتطفى النار.
اعصرى ليمونتين على الخليط ده وحطيه فى علبه فالتلاجه بعد ما يبرد هتلاقيه بعد كده اتجمد تانى وبقا زى الكريم، اما تحبى تستخدميه خدى منه بالمعلقة على اد طول شعرك مثلا معلقة كبيرة وسيحيه على النار وادهنى شعرك كله وغطيه بكيس بلاستيك وسيبيه حوالى ساعه بعد كده اغسلى شعرك عادى جدا بالشامبو.

العناية الأسبوعية لليدين

كتير من البنات بتهمل ايديها وبتفاجأ انها اغمقت وبقى ملمسها جاف وخشن، اولا لازم تعرفى ان الصابون والمنظفات كلها مواد بتضر الأيدين جدا عشان كده بنصحك دايما تلبسى جوانتى اثناء غسيل الاطباق او استخدام اى نوع من المنظفات والمطهرات.
ثانيا لازم ترطبى ايديكى دايما بكريم مرطب وتصنفريها اسبوعيا على الاقل عشان تزيلى الجلد الميت اللى بيكون سبب لخشونة الجلد، الروتين الى هقولكوا عليه انهارده لو مشيتى عليه مرة كل أسبوع مع الترطيب المستمر طول الاٍسبوع هتلاحظى تغيير واضح فى ملمس وشكل ايديكى.
اول جزء فى الروتين ده هو مرحلة الصنفرة وإزالة الجلد الميت عن طريق اى صنفرة جاهزة او ملح الحليب او ممكن انتى تعملى صنفرة بنفسك مكونة من ملح مضاف ليه بعض قطرات من عصير الليمون، بعد ما بتصنفرى ايديكى بتغسليها بمية دافية، بعد كده بتنتقلى للجزء التانى وهو ترطيب الجلد وده بيكون عن طريق انك بتجيبى كوب لبن بتسخنيه على النار وعليه معلقة زيت لوز حلو وبعد ما ترفعيه من على النار ويبرد شوية بتضيفى عليه معلقة جلسرين وتقلبي الخليط وتنقعى ايدك فيه حوالى 10 دقايق وبعد كده اغسلى ايديكى وابدأى اخر مرحلة وهى تغذية الجلد.
هتخلطى نص معلقة عسل ابيض مع نص معلقة زبده وتفضى عليهم كبسولة فيتامين E وتدهنى ايديك بالخليط ده ولو اتبقى منه حاجه شيليه فالتلاجه والبسى جوانتى بلاستيك او كيس لو مش عندك جوانتى وسيبيه نص ساعه بعد كده اغسلى ايديكى بمية دافية وبعدها مية ساقعة وفى الاخر ادهنى اى كريم مرطب عندك، هتلاحظى ان ايديكى بقت فى منتهى النعومة واللمعان.
ملحوظة: اللبن الى مضاف عليه الزيت شيليه فى التلاجه واستخدميه كذا مرة حتى لو ريحته بدأت تغير مفيش مشكلة.

اصنعى بنفسك بديل للصابون المغربى الأسود

الصابون المغربى الأسود الى بنستخدمه فى الحمام المغربى معروف بفوايده فى تفتيح وتنقية البشرة من البقع والأسمرار وطبعا النوع الأصلى منه بيكون عبارة عن ماده سوداء كريمية وفى علبة،على غير الى ناس كتير فاكراه انه عبارة عن صابونة عادية ،لا دى بتكون انواع صابون عادية مش صابون مغربى، وده للأسف مش بيكون متوفر دايما فى المحلات، انهارده هقولكوا على وصفة بديلة للصابون المغربى وتقدرى تعمليها بنفسك ومكوناتها موجودة عند كل عطار ومش مكلفة وهتعيش معاكى فترة طويلة ونتايجها مرضية جدا وكل مكوناتها مفيدة اوى للبشرة.
الوصفة دى عبارة عن انك بتجيبى حلة او اى علبة معدن وتجيبى صابونة غار من عند العطار،بيكون لونها اخضر وريحتها قوية شبه النعناع ودى فى ناس بتغسل بيها شعرها(دى غير صابونة نابلسى شاهين)، هتبشرى الصابونة كلها فى الحلة وتضيفى عليها فنجان صغير زيت زيتون وفنجان زيت لوز مر وفنجان ماء ورد وفنجان مية عادية وهتعصرى عليهم ليمونة متوسطه وتقلبى الخليط وتسيبيه مثلا لمده ساعة لحد ما الصابون يدوب تماما وكله يمتزج ببعضه، بعد كده هتحطى الخليط ده فى برطمان زجاج وتشيليه فى التلاجه وتاخدى منه على قد الأستخدام.
وبيستخدم زى طريقة الصابون المغربى بالظبط بنخلطه بحنة ونعمل بيه الحمام المغربى والخليط ده طول ما هو فى التلاجه نقدر نحتفظ بيه لمده طويلة جدا من غير ما يحصله اى حاجه وعلى فكرة صابونة الغار مش غالية فى حدود 10 جنيه والزيوت ومية الورد فى حدود 13 جنية يعنى كله 23 جنيه بس انصحك تشترى الزيوت المعلبة مش السايبة لانها بتكون اضمن وانضف.

اصنعى الحنا البيضا بنفسك

الحنا البيضا مش مكونة من نبات الحنة الى بيستخدم للشعر ولكن مكونة من خلطة معينة ومكوناتها سهلة جدا وممكن تعمليها بنفسك ولو مكسلة هتلاقيها جاهزة عند العطار،وقبل ما اقولك مكوناتها هقولك ايه هى فايدتها .
الحنة البيضا بتستخدم لتفتيح البشرة وتنقيتها من الشوائب زى اثار حب الشباب والبقع والكلف كمان بتدى نضارة للبشرة ونعومه فائقة وتقدرى تستخدميها على الوجه والجسم زى اى ماسك عادى وممكن تستخدميها فى الحمام المغربى كبديل للطمى ولو مش عارفة ازاى تعملى حمام مغربى هتلاقينى منزلة موضوع عنه فى نفس المدونة.
مكونات الحنه كلها موجوده عند العطاروممكن تعملى كمية وتشيليها فى علبة او تعملى كمية صغيرة قبل كل مرة هتستخدميها، المكونات عبارة عن:لسان البحر مطحون(الى هو العضمة الى فى ضهر السبيط او الكاليمارى)-ترمس مر مطحون-فاصوليا بيضا مطحونة-شبة مطحونه.
هناخد مقادير متساوية من كل حاجه يعنى مثلا معلقة لسان بحر ومعلقة فاصوليا ومعلقة ترمس والشبة تبقى نص المعيار يعنى نص معلقة ونقلبهم ونعجنهم بمية ورد او مية عادية ونفردها على الوجه بعد تنظيفه بالغسول او نستخدمها على الجسم بس يكون نظيف تماما ومش عليه اى لوشن او كريم وبنسيبها لحد ما تنشف خالص ونفركها بحركات دائرية بالراحه جدا وبعد كده بنغسل الماسك ونقفل المسام بمية ورد ولازم بعده نحط كريم مرطب.

اسباب وعلاج رائحة الفم الكريهة

رائحة الفم الكريهة من اكتر المشاكل المحرجه الى ممكن تأثر على الحياة العمليه للشخص المصاب واوقات كتير الشخص مبيكونش عارف الا لما حد بيلفت نظره والمشكلة دى ليها اسباب كتيروعشان نكتشف اذا كنا بنعانى من رائحة الفم الكريهة او لأ ممكن نعمل اختبار صغير وهو اننا بنلعق ضهر الايد باللسان ونتستنى لحد ما يجف وبعدين نشم الايد او نمرر خيط الاسنان بين الضروس وبعد كده نشمه او ممكن نحاول نطلع لسانا للاخر ونبص فى المراية اذا لقينا فى اخر اللسان بقع لونها ابيض يبقى ده سبب للروائح الكريهة او ممكن نسأل حد قريب مننا وبنثق فيه.
اوقات بيكون فى اعراض بتصاحب المشكلة دى زى جفاف الفم او الشعور بطعم معدنى فى الفم، ظهور بقع صفرا او بيضا على اللسان او نزول سوائل من الأنف فى مؤخرة الفم ومش لازم الاعراض دى كلها تظهر مجتمعة .
من الاسباب الى بتؤدى للمشكلة دى هى تناول بعض الاكلات الى بتحتوى على زيوت طيارة زى البصل والثوم او تناول طعام بيحتوى على كثير من البهارات والتوابل، او ممكن تكون المشكلة بسبب اهمال نظافة الاسنان والفم عموما وتراكم بقايا الطعام بين الاسنان، كمان جفاف الفم بيعتبر احدى مسببات هذه المشكلة وده بيحصل اثناء النوم او الصيام والتدخين بيؤدى ايضا لجفاف الفم او بعض الادويه زى مضادات الحساسية او ادوية السكر وارتفاع ضغط الدم.
من الاسباب ايضا المؤدية لهذه المشكلة هى الاصابة بامراض معينة زى الفشل الكلوى والالتهاب الرئوى وامراض المعدة والقيء المستمر او وجود التهابات فى الفم او اللثة او الحلق او الانف او التهاب اللوزتين وامراض الجهاز التنفسى الى بتسبب بلغم وده بيكون سبب قوى لوجود الرائحة الكريهة.
طيب ازاى نقدر نعالج المشكلة؟
لو كانت مزمنه ومش بتروح حتى مع غسيل الاسنان والاهتمام بنظافة الفم يبقى لازم مراجعة طبيب الاسنان وهو هيقدر يحدد سبب المشكلة ونخلى بالنا ان قبل زيارة الطبيب بلاش ناكل اى حاجه او نستخدم غسول فم او احمر شفاه لان روايح الحاجات دى هتداخل مع رائحة الفم والدكتور مش هيعرف يحدد.
 الى لازم نواظب عليه عشان نتفادى المشكلة دى هى اننا نغسل الاسنان على الاقل مرتين يوميا ونستخدم خيط الاسنان وغسول للفم عشان يقضى على البكتريا كمان لازم نغير الفرشاه كل 3 شهور ولا نكتفى بتنظيف الاسنان فقط بها، نحاول ننضف اللسان برضو بس بالراحه عشان منجرحش نفسنا.
* يفضل استخدام لبان خالى من السكر وخصوصا بعد شرب القهوة ومشتقاتها او الحليب او التدخين.

اعرفى شكل جسمك وايه الى يليق عليه

جسم الساعه الرمليه hourglass وده بيكون جسم متناسق، منطقة الوسط رفيعه وفى تناسق ما بين منطقة الصدر والأرداف،الجسم ده بيليق عليه جدا الفساتين المجسمه شوية وكمان صاحبة الجسم ده تقدر تلبس الاحزمه براحتها عشان منطقه الوسط عندها كويسة، اللبس الواسع اوى مش هيبقى حلو والكعب العالى هيبين شكل الجسم احلى، كمان الجيب بتليق اوى على صاحبة الجسم ده لكن متكونش ضيقه لا هى ولا البنطلون عشان متبينش منطقه الفخذين انها عريضه وطبعا الالوان الغامقة للبنطلون او الجيب هتبقى احلى، بالنسبه للتوب يفضل تبقى الفتحه على شكل V ويكون مجسم من عند الوسط واى طول للتوب او الجاكت هيليق على الجسم ده.
جسم التفاحه بيكون مليان من فوق يعنى منطقة الصدر والذراعين تخينه والبطن كمان مليانه والرجلين بيبقوا رفيعين، الجسم ده يليق عليه بنطلونات واسعه عشان تبين الجزء السفلى اعرض شويه ويبقى متناسق مع الجزء العلوى، الجاكت الافضل يكون مفتوح او بصف زراير واحد وبلاش يكون التوب استرتش او فيه استك على الذراعين كمان الهاى كول مش هتبقى حلوة وطبعا الالوان تبقى اغمق فوق وفاتحه فالجزء الى تحت.
جسم الكمثرى وده بيكون فيه منطقة الارداف اعرض من الجزء الى فوق ومنطقة الصدر والوسط صغيرة وصاحبة الجسم ده تلبس بنطلون او جيب نازلة بوسع وتركز على الجزء الى فوق يبقى الوان فاتحه وفيه نقشات او خطوط بالعرض وياريت التوب يكون فيه اوبليت عشان يبين كتافها اعرض وتلبس اكسسوارات من فوق عشان تركز الانتباه عليها، وتلبس حمالة صدر مبطنه عشان تبين الجزء العلوى متناسق مع الى تحت وابعدى عن اى لبس ضيق لانه هيبين عدم التناسق ،كمان الكعب العالى هيبين الجسم احلى.
جسم المثلث المقلوب بيكون فيه الكتاف عريضه ومنطقه الصدر مليانه والرجلين رفيعه، تختار جاكت ضيق من عند الوسط ومن غير اوبليت ويكون اغمق من الى تحت واى بنطلون او جيب هيبقى حلو عليها بس ميكونش واسع جدا وتبعد عن الحاجات الاسترتش واى توب يكون فيه هاى كول لانه هيبين منطقة الصدر اكبر عشان كده تختار توب يكون مفتوح من فوق مش مقفول.
جسم الموزة وده جسم نحيل وبيكون كله نفس العرض وممكن تلبسى بنطلونات ضيقه وجيب فيها كذا طبقة واختارى الفساتين القصيرة وتكون ماسكه من عند الوسط والكعب العالى او الفلات بيليق عليها.

زيت اللوز الحلو والمر، لازم تعرفى الفرق

زيت اللوز الحلو لونه اصفر خفيف وله ريحه خفيفة وده بيستخرج من اللوز العادى الى احنا بناكله، ومن فوايده اننا لو دلكنا بيه فروة الرأس بيساعد على تغذية الشعر ولمعانه وبيفيد ايضا فى اطالة الشعر لأحتوائه على الحديد والماغنسيوم، عشان كده هنلاحظ دايما انه بيدخل فى تركيب منتجات كتير للشعرمن شامبوهات وكريمات.
اما عن فايدته للبشرة فهو بيعتبر من اقوى الزيوت الى بتساعد على منح البشرة الليونه والترطيب وحمايتها من الجفاف والتجاعيد لاحتوائه على فيتامين E المعروف بفوايده للبشرة والجلد.ممكن تستخدميه كمرطب للشفايف الجافه قبل النوم او كماسك للوجه (نص معلقة زيت لوز-معلقه لبن بودرة ونص معلقة عسل ابيض وقطرات من عصير الليمون) نخلطهم مع بعض ونسيبهم على الوجه ثلث ساعه وبعد كده نغسله بماء فاتر،الماسك ده بينعم البشرة جدا وبيساعد على تفتيحها.كمان ممكن ندهن اسفل العين بقطنه عليها زيت اللوز وده بيساعد فى تخفيف الهالات تحت العين.
كمان ممكن تدهنى ايديكى بزيت اللوز الحلو وتلبسى جوانتى قطن او تدهنى رجليكى بيه وتلبسى شراب هتصحى من النوم تلاقى رجليكى وايديكى فى قمة النعومة.
زيت اللوز المرلونه بيكون شفاف ومالوش ريحه وده بيستخرج من نوع لوز شكله مختلف عن الى احنا بناكله شويه وبيستخدم بجرعات اقل بكتير عشان الماده السمية الى فيه وطبعا ممنوع تستخدمه الحامل او الى بترضع والأطفال، الزيت ده بيستخدم فى اغراض علاجية وومش بيتاكل، اما عن فوايده التجميلية فهو مش بيدخل خالص فى وصفات الشعر لكن فايدته بتظهر فقط لو استخدمناه للبشرة.
لو حبيتى تستخدميه للبشرة هيساعد على تفتيحها وازالة البقع بس لازم نستخدم منه كمية قليلة اوى يعنى ممكن نخلط معلقة صغيرة خالص منه على كريم خفيف زى جونسون مثلا، اما لو حبيتى تستخدميه للهالات السودا ممكن تضيفى نقطتين منه على لبن ساقع وتعمليه كمادات بالقطن تحت عنيكى بس ميدخلش جوه عنيكى خالص ولازم تاخدى بالك.
وده شكل اللوز المر بيكون مدور شويه غير اللوز الحلو بيكون اطول وارفع.

كل شىء عن عطرك

استخدام العطور موجود منذ الازمان الغابرة حتى ان كل الشعوب البدائية كانت بتحيط طقوسها الدينية بهالة من الدخان المعطر وده بيفسر معنى كلمة "برفان" وهو اسم فرنسى مشتق من كلمة لاتينيه قديمة هى "برفومبون"ومعناها الاحتراق.ومع مرور الوقت بدأت صناعة العطور تتطور حتى ان العرب اخترعوا "الانبيق",- وهو اناء تقطير العطور- فى العصور الوسطى,وانتشر استخدام العطور مع الوقت الى ان اصبح عادة لا تستغنى عنها اى امرأة من اجل اناقتها واشاعة جو من السحر والغموض.
العطور هى تركيبة فنية من اصول حيوانية مثل المسك والعنبر او اصول نباتية وهى اقل نفاذا وتوجد فى الازهار مثل الورد والقرنفل او القشرة زى شجرة القرفة او فى الثمرة نفسها زى الليمون.وهناك طرق كثيرة لأستخلاص العطور مثل التخمير,السحق والنقع.
ازاى احدد درجة ثبات العطر وهل يناسبنى ولا لأ؟
اغلبنا بيختبر العطور عن طريق اننا بندخل المحل ونبدأ نختبره على ايدينا ونختار لكن الطريقة دى مش صح لان كل الروايح بتدخل فى بعضها ومش هتعرفى تميزى صح,لكن الافضل انك تكتفى باختبار نوعين, واحد فقط على كل ايد واعملى جولة فى المول مثلا وبعد مرور فترة العطر هيبدأ يخف ويتبقى شذى خفيف وده الى نقدر نحكم منه صح هل العطر ده مناسب ولا لأ.
ومهم جدا تختارى العطر الى بيناسب شخصيتك والى يناسب الوقت والمكان لان فى عطور نفاذة جدا وعطور خفيفة,وايا كان نوع العطر لازم تراعى انه لو زاد عن الطبيعى بيبقى مش حلو ابدا ولازم تخلي بالك من النقطه دى لو رايحه تزورى حد مريض او الصبح مثلا وانتى رايحه شغلك بلاش العطور القوية النفاذه اوى.ولو هتشترى لحد هدية لازم تعرفى ذوقه فالعطور لان الانواع كتير وممكن تشترى نوع عطر غالى اوى بس يكون مش مناسب للشخص ده.
خلى بالك ان فى انواع اقمشه تعتبر عدوه للعطور زى النايلون كمان الفرو ليه نوع عطور مخصوصة ,وخلى بالك بلاش ترشى العطور على جلدك اذا كنتى هتتعرضى للشمس لانها هتسببلك بقع على جلدك.

الترمس الحلو والمر وفائدته

الترمس هو نوع من البقوليات وتنتشر زراعته فى مصر ولبنان وسوريا وبيعتبر ايضا من المسليات الخفيفة,وبيحتوى على نسبة كبيرة من البروتينات والالياف لذلك بينصح به لمرضى السكرى كمان بيساعد فى تقوية الاعصاب.اما بالنسبة لفوائده الجمالية ده بيعتمد على نوعه لان الترمس نوعين وكل نوع فيهم له فايده عكس النوع التانى تماما.
اول نوع هو الترمس البلدى او المر وده بيكون لونه مصفر وحجمه صغير وطعمه مر لانه فيه ماده شديدة السمية عشان كده خطر ناكله من غير ما ننقعه كتير عشان نشيل منه المرارة دى,من فوايد الترمس المر انه بيعتبر منقى للبشرة من الشوائب واثار حب الشباب وممكن نستخدمه كماسك للوجه عن طريق اضافة معلقة كبيرة من الترمس المرالمطحون مع لبن ونعجنهم مع البعض ونفردهم على الوجه لمده ثلث ساعة مرة واحدة فى الاسبوع,كمان ممكن تستخدمه كتونر للبشرة عن طريق اننا ننقع الترمس المر المطحون فى مية مغليه ونحفظه فالتلاجه ونمسح الوجه بقطنه بعد غسله.
اما الفايده الاكبر من الترمس المر هى انه بيقلل نمو الشعر مع تكرار الاستخدام وبنستخدمه بنفس طريقة التونر بمعنى اننا بننقع الترمس فى مية مغلية يوم كامل ونحفظه فى التلاجه ونعصر علية نص ليمونة وبعد ازالة الشعر من الجذور تانى يوم نبدأ نمسح المكان ده بمية الترمس الى هنكون مصفينها ونستمر على الوصفة دى مرتين فى اليوم بعد ازالة الشعر لمده 6 ايام ومع التكرار هنلاحظ ان الشعر الى بينمو بقى اخف بكتير.
اما النوع التانى من الترمس هو الترمس الحلو او المستورد الى اغلبنا بيشتريه عشان الاكل وبيكون حجمه اكبر من الترمس المر ولونه ابيض وده فايدته عكس النوع التانى تماما بمعنى انه بيتقل الشعر لو قومنا بدهان فروة الرأس بمنقوع الترمس الحلو ده بيساعد فى نمو الشعر المتساقط وبيعمل على كثافته.
يبقى اهم حاجه نخلى بالنا واحنا بنشتريه لازم نكون ضامنين المكان ومتأكدين من نوع الترمس لان لو حصل لخبطة وحطيتى مثلا الترمس المر على شعرك ممكن يسببلك صلع او العكس لو حطيتى ترمس حلو على ووشك هيزود الشعر.
بالنسبة لأستخدام الحامل للترمس المر ياريت تسألى دكتور قبل ما تستخدمى اى حاجه زى كده.

نصائح لشعر المحجبات

بنات كتير بعد ما بتتحجب بتهمل شعرها وطبعا ده غلط لان الاهمال بيسبب مشاكل بتاخد مننا وقت عشان نعالجها وفى بنات بتعمل حاجات غلط من غير ما تاخد بالها ان الحاجات دى ممكن تأذى شعرها.
اول حاجه مفيش داعى لغسل الشعر كتير لان ده غلط سواء محجبة او غير محجبة لان الشعر بيكون فيه زيوت طبيعية بيفقدها مع تكرار الغسيل, يعنى بالكتير تغسلى شعرك 3 مرات فى الاسبوع وبعد ما تغسليه سبيه ينشف كويس قبل ما تلميه واوعى تلبسى الحجاب وشعرك لسه مبلول لان الرطوبه هتخلى ريحة شعرك مش حلوة وممكن تسبب قشرة ولو متعوده تنشفيه بالسيشوار حاولى تقللى استخدامه على اد ما تقدرى عشان تحافظى على شعرك.
لازم تعملى حمام كريم على الاقل مرة اسبوعيا عشان يحافظ على نعومه شعرك وترطيبه وممكن كمان تعملى حمام زيت مناسب لنوع شعرك ولما تيجى تسرحيه استنى لحد ما ينشف شويه لان الشعر وهو مبلول بيكون ضعيف جدا وبيقع بسهولة واختارى مشط اسنانه واسعه ويكون مصنوع من الخشب.
حاولى كل يوم تغيرى فرق الشعر ومتسبتيش على شكل معين عشان ممكن الشعر يبدأ يقع وكمان متشديش شعرك اوى بالتوكه لان ده بيخلى الشعر يتساقط. وديما الطرحه الى تكون لامسه شعرك او البندانه اختاريها قطن عشان تخلى شعرك يتنفس وبلاش تلبسى طرح كتير فوق بعض لان كتمه الشعر دى وخصوصا لو بتلبسى الحجاب مده طويلة من اهم اسباب تساقط الشعر.

اتيكيت ارتداء المجوهرات والاكسسوارات

ما من شك ان المجوهرات والاكسسوارات زينة جميلة لكن الاسراف فيها بيقلب الاية, عشان كده لازم نخلى بالنا واحنا بنختار هنلبس ايه ولازم نعرف ان البساطه هى احدى رموز الاناقة.
لازم تعرفى ان الالماس و الاحجار الكريمة بتتلبس فقط فى المناسبات, ولا يفضل انك تلبسى ساعه على لبس سواريه خصوصا لو ساعه كبيرة, كمان مينفعش تخلطى مجوهرات حقيقية مع اكسسوار تقليد لانه كده هيفقد قيمته كمان مينفعش تلبسى دهب مع اى معدن تانى لانه بيبوظه وبيعمل تآكل فى قشرته الخارجية.
لو رايحه تزورى ناس متواضعين اجتماعيا بلاش تسرفى فى لبس المجوهرات لانهم ممكن يفتكروكى بتتعالى عليهم.كمان لو رايحة مكان عمل او تزورى ناس فى مناسبة حزينه بلاش تلبسى اكسسوارات بتسبب صوت مزعج زى الاساور الكتير.
الخواتم: بلاش اكتر من خاتم واحد فى كل ايد وخصوصا لو كان ضخم ولو من الخواتم الرفيعه اوى ممكن تلبسى كذا واحد فوق بعض وخلى بالك ان الخاتم بيلفت النظر لأيدك يعنى تهتمى بشكل ايدك واظافرك.ولو صوابعك طويلة بلاش خواتم فيها فصوص صغيرة اوى عشان متبنش اطول.
لو لابسه كذا اسورة بلاش خواتم والعكس لو لابسه خاتم ضخم مفيش داعى تلبسى حاجه تانى فى ايدك,الحظاظات والاكسسوارات الجلد مينفعش تلبسيها على لبس فورمال او سواريه.
الساعة لازم يكون لونها ماشى مع باقى لبسك والساعات الجلدية الملونه بتليق اكتر فى فترة الصباح مع اللبس الكاجوال, اما الساعات الرقيقة الى بيكون اطارها دهبى او فضى بتكون حلوة جدا فى فترة الليل.
لو رقبتك قصيرة بلاش تلبسى السلاسل الرفيعه الضيقة والعكس لو رقبتك طويلة بلاش العقد الطويل.ولو لابسه حلق ضخم يبقى مفيش داعى لعقد وممكن تكتفى بسلسلة رفيعه جدا,اما لو لابسه عقد ضخم يبقا تختارى حلق صغير جدا زى الى بيكون عبارة عن فص صغير.
الحزام مفيش داعى تلبسى معاه عقد طويل حتى لو حزام رفيع وممكن سلسله رفيعه.لو لابسه فستان او بلوزة ياقتها مقفولة ممكن تلبسى حلق كبير ولو الياقة مفتوحه ممكن تلبسى سلسلة ضيقة هتكون حلوة اوى.
النظارة لازم يكون لون الاطار بتاعها ماشى مع لون لبسك او اختارى لون محايد يمشى مع كل حاجه, ولو حابة تلبسى فولار حوالين رقبتك الافضل يبقى حرير ناعم ويكون لونه ماشى مع لبسك.
اكسسوارت القدمين زى الخلخال والخواتم الصغيرة مينفعش تتلبس فى سهرة او مع لبس فورمال.

بعض قواعد الأتيكيت للضيوف

من الاشياء الضروريه الى لازم كل بنت تعرفها هى ازاى تتصرف بلباقة وشياكه لما تكون معزومه عند حد عشان تسيب انطباع كويس عند الناس وخصوصا لما تكون اول مرة تزورهم,لازم تهتم بشوية تفاصيل صغيرة عشان تظهرى قدامهم بمظهر لائق.
اول حاجه الوقت, لازم تديله جانب كبير جدا من انتباهك بمعنى انك لازم توصلى فى الوقت المحدد للعزومه لان تأخيرك هيكون تصرف مش لائق ابدا وخصوصا لو فى ناس تانية معزومه معاكى, كمان متوصليش بدرى اوى عن معادك لأنك هتخلى صاحبة البيت تتوتر وتبقى مش عارفة تقعد معاكى ولا تقوم تجهز الأكل.يبقى توصلى فى معادك عشان تضمنى ان اصحاب البيت على اتم استعداد لأستقبالك.
لو حصل ظروف هتمنعك انك تروحى العزومه يبقى لازم تتصلى بالناس تعتذرليهم بمجرد انك تعرفى انك مش رايحه عشان ميفضلوش يستنوا وانتى اصلا تكونى مش رايحه, ولو رحتى ولقيتى ناس متعرفيهاش بلاش تحسسيهم انك مخضوضة او مضايقة ابتسمى وعرفيهم بنفسك وافتحى معاهم اى حوار بسيط.
اعرضى على المضيفة انك تساعديها بس من غير إلحاح لأن فى ناس مش بتحب حد يشوف هى بتطبخ ازاى بيعتبروا الطبخ ده اسرار حربية او ممكن تكون بترتبك اما حد غريب يقف معاها فالمطبخ عشان كده لو رفضت مساعدتك بلاش تفضلى تلحى عليها كذا مرة.
مش لازم تستنى اخر واحد عشان تمشى خليكى ضيفة خفيفة واشكرى الناس قبل ما تمشى على تعبهم واظهريلهم انك قضيتى معاهم وقت جميل حتى لو مكنش ده حقيقى اوى يعنى, ولازم يكون لبسك مناسب لمكان وطبيعة العزومه ولو مش عارفة ممكن تسألى صاحبة العزومه عادى عشان تعرفى هتلبسى ايه.
وانتى رايحه لازم تاخدى معاكى اى هدية بسيطه زى ورد او حلويات مثلا, تعبير بسيط يعنى عن الشكر.
اوعى تاخدى معاكى حد مش معزوم لان الحركه دى مش حلوة ابدا لان ممكن صاحبة العزومه عاملة حسابها على عدد معين او ممكن تكون مش بترتاح اصلا للشخص الى انتى واخداه معاكى ولو ضرورى تاخدى حد معاكى استأذنى من صاحبة العزومة.والكلام ده ينطبق على الاطفال لان مش كل الناس بتحب الاطفال ده غير ان ممكن تكون طبيعة العزومه مينفعش يكون فيها اطفال فياريت تسيبهم مع حد وتبقى ضيفة مش متعبة.
لو حصل انك واخده معاكى اطفال لازم يبقى معاكى شنطه صغيرة فيها كل حاجه ممكن يحتاجوها سواء هدوم زياده او حفاضات او اكل معين لو هما صغيرين اوى لان لو رحتى عزومه وطلبتى حاجه زى كده وارد جدا يكون مش عندها وتحرجيها.ولو ولادك كبار شوية علميهم ازاى يقعدوا هاديين مش تسيبيهم يصرخوا ويتنططوا ويقوموا يتجولوا فالبيت براحتهم.
طيب لو انتى رايحه عند حد تزوريه من غير عزومه ولا حاجه يبقى لازم وضرورى تتصلى قبلها بيوم على الاقل وتسألى ينفع تزوريهم ولا لأ, انا عن نفسى بضايق جداا من الناس الى تتصل تقولى انا جاية دلوقتى طيب افرض انى خارجة مشوار ولا عايزة انام ولا ماليش مزاج استقبل حد متجيش تفرضى روحك كده عليا, يبقى لازم تتصلى الاول قبلها بمده كافية عشان تتأكدى ان الناس مستنياكى وهى مش مضايقة وقاعده تقول فى سرها امتى تقوم بقى.
وانتى قايمه ماشية وصاحبة البيت اتحايلت عليكى وقالتلك لسه بدرى والكلام ده متستهبليش وتقعدى لا طبعا لان هى طبيعى تقول كده وانتى اشكريها وقومى, كمان بلاش حركه الكلام على الباب دى كأنك محوشه الكلام لأخر لحظة طالما قررتى تمشى يبقى متفتحيش موضوع جديد وسلمى على الناس وامشى على طول.

زيت السعد

زيت السعد معروف بفايدته  فى تقليل نمو الشعر,وهو فعال اكتر من استخدام النبات نفسه لكن مشكلته ان ريحته غير مستحبة اطلاقا, عشان كده هنضيف عليه بعض الاضافات عشان نحسن من ريحته ونستفيد منه فى تقليل نمو الشعر.
هنشترى من عند العطار زيت سعد-زيت مشمش-زيت ورد-زيت ليمون, وهنشترى زيت برفان خام من عند الناس الى بتركب برفانات اى ريحه بتحبيها وهنشترى اى body lotionبتحبيه او لو عايزة تستخدمى كريم يبقى جليسوليد عشان بيمتزج بالسوائل كويس.
هتفضى الكريم او البادى لوشن فى علبه كريم كبيرة ونحط عليها زيت السعد وكفاية نص الزجاجه طبعا هتلاقى ريحته صعبه جدا,نبدأ نضيف معلقة كبيرة من باقى الزيوت ونقلب كويس هتلاقى ان ريحة كل الزيوت دى امتزجت مع بعضها ولما تضيفى عليهم زيت البرفان هتلاقى ان ريحة السعد خفت جدا تكاد تكون اختفت.وبكده تقدرى تستفيدى من زيت السعد من غير ما تتضايقى من ريحته.

خلطة زيوت لإنبات الشعر المتساقط

هنجيب طبق ونحط فيه نصف معلقة صغيرة من كل الزيوت دى ونقلبهم وندفيهم فى حمام مية على الناروندلك فروة الراس ونغطى الشعر ونسيبه من ساعة لساعتين وبعد كده نغسله كويس:
زيت زيتون-خروع-جرجير-جوز هند-أملج-خردل-لوز حلو-سمسم-كاموميل-حبة البركة.
*من الأفضل تشترى زيت من ماركة معروفه زى الكابتن او الحواج بيكون اضمن من الزيوت السايبة.

طريقة عمل حمام الزيت للشعر

بنات كتير فاكرة ان الزيت بيستخدم زى كريم التصفيف وبيدهنوا بيه شعرهم كله ويسيبوه او يخرجوا بيه وده طبعا غلط جدا لان وظيفة الزيت انه يغذى فروة الرأس وبالتالى هيساعد الشعر انه ينمو أسرع ويبقى صحى ولامع, عكس كريم التصفيف وحمامات الكريم بنحطها على الشعر فقط ومش بنقربها من فروة الراس.
الى بيحصل اما بتدهنى شعرك بالزيت وتسيبيه بيسد فروة راسك ومع الوقت الشعر بيقع كمان بيلم تراب ويخلى الشعر ينشف ويبقى بهتان ومع الحر بيعمل ريحه مش حلوة.
يبقى لازم نتفق ان زيت سواء من عند العطار او جاهزبنحطه على فروة الراس فقط وندلكه عشان ننشط الدورة الدموية ونسيبه حوالى ساعه ونكون مغطيين الشعر ببونيه وبعد كده نغسله كويس.
من الزيوت المشهورة والحلوة جدا زيت دابر أملا ولو لاحظتى فى الاعلان الى بيجى فى التليفزيون هتلاقى الام بتدلك فروة راس بنتها بالزيت ومش بتدهن الشعر كله.
ملحوظه مهمة جدا:لو عندك اكزيما دهنية او قشرة يبقى حمام الزيت مش مناسب ليكى لانه هيزود القشرة جدا,واكتفى بحمام الكريم من غير ما تقربيه من فروة راسك.

وصفة نبات السعد و السكران لتقليل نمو الشعر

هنشترى من عند العطار سعد مطحون و سكران مطحون لو ملقتيش مطحون اطحنيه انتى بس خلى بالك انه محتاج كبة قوية اوى عشان طحنهم صعب واشترى كميه قلية مثلا 1/8 كيلو من كل حاجه وهما مش غالين.
هنجيب كوباية ميه مش كبيرة اوى ونحط فيها معلقة كبيرة من السعد ومعلقة سكران ونسيبهم منقوعين 3 ساعات وبعد كده نغليهم على النار لحد لما المية ينقص حوالى ربعها ونصفي المية ونحفظها فى التلاجه وندهن الجسم بيها بعد ازالة الشعر مرتين فى اليوم لمده 5 ايام و ممكن بدل ما تدهنى المية لوحدها تضيفها على كريم جليسوليد,هينعم الجسم اكتر.
* نبات السكران شكله شبه الخشب او السواك و لونه بيج فاتح

روتين لتفتيح الوجه

1-ماسك: معلقة لبن بودرة - ماء ورد - نقط من عصير الليمون نعجنهم مع بعض ونتركهم على الوجه 20 دقيقة ويستخدم مرة اسبوعيا.
2-مقشر: معلقة عسل ابيض - لوز مطحون خشن - عصير ليمونه ويستخدم مرة اسبوعيا.
3-لوسيون: فنجان ماء ورد - معلقة صغيرة زيت ورد نحطهم فى بخاخة ونستخدمها مرتين يوميا ونرجها الاول والاحسن نحطها فى التلاجة.

نصائح لتقليل السمنة

- نبطل الاكل المحمر وناكله مسلوق او مشوى.
- نقلل السكروالنشويات.
- نقلل الدهون:يعنى نشرب لبن خالى الدسم وجبنه قريش بدل باقى الجبن الدسمة.
- نكتر عدد الوجبات ونقلل كمية الاكل فيها عشان نزود سرعة الحرق.
- بلاش ناكل قدام التليفزيون عشان منسرحش وناكل اكتر.
- لا يفضل الاكل بعد الساعة 8 مساءا لان سرعة الحرق بتكون قليله بعد الوقت ده.
- لما نحس بالجوع نفكر فى اى حاجه تانية و غسيل الاسنان بيدى احساس بالشبع.
- بلاش نخلى موجود فيه حاجات فيها سعرات البيت عالية زى الشيبسى والبونبون.

حمام كليوباترا لترطيب الوجه و الجسم

1

معلقة كبيرة لوز مطحون-1 معلقة كبيرة شوفان مطحون-2 معلقة لبن بودرة-2 معلقة زيت ورد-ميه للعجن
هنعجن المكونات بميه دافية لحد ما تبقى عجينه شبه سائلة وبعد الشاور ندهن بيها الوجه ونسيبه نصف ساعة والجسم نسيبة ساعه لان بشرة الجسم ممكن تستحمل اكتر من الوجه وبعد كده هنشطف الجسم بمية فقط.
وممكن نعمل الماسك ده بعد استخدام الصابون المغربى.

طريقة عمل الحمام المغربى فى المنزل

المكونات: بونيه للشعر-صابون مغربى وده شكله بيكون زى الكريم ولونه اسود-حنه بيضا او
حنه عادية ومتخافيش مش هتصبغ الجسم-ليفة مغربية-ماء ورد- طمى مغربى وكل الحاجات
دى موجوده عند العطار.

اول حاجه هتملى البانيو مية سخنه وتقعدى فيه حوالى ربع ساعه وبعد كده هتنشفى جسمك من المية وتدهنيه الصابون المغربى بعد ما تكونى عجنتيه بالحنه وتكونى مغطية شعرك عشان ميبوظش من البخار وتتستنى 10 دقايق.
هتغسلى جسمك من الصابون بمية سخنه وتبدأى تفركى الجسم كله بالليفة المغربية من تحت لفوق وهتلاحظى ان الجلد الميت بيقع وانتى بتفركى جسمك ده معناه انك ماشية صح.

بعد ما تفركى جسمك كله هتغسليه تانى بالميه وتنشفيه وتدهنيه بالطمى المغربى وده عبارة عن قطع ناشفة واول ما بتحطى عليه مية الورد هيبقى شبه العجينه او سايل اكتر حسب ما بتزودى الميه وتستنى لحد اما ينشف على جسمك وتغسليه بالمية كويس وتنشفيه .
اخر خطوة هتدنى جسمك كله بمية الورد عشان تقفلى المسام.

ملحوظة:
فى ناس بتحب تخلط الصابون المغربى بعصير ليمون لكن كده غلط لانه ممكن يقلب بسواد مع البخار.
ممنوع نفرك الجسم وهو عليه الصابون لازم نغسله كويس وبعد كده نبدأ نفركه.
الجسم ميكونش عليه اى ماده دهنية زى كريم او بادى لوشن قبل الحمام المغربى بيوم عشان اضمن انى هقدر اشيل الجلد الميت بطريقة صح.

ازاى نختار النظارة حسب شكل الوجه

1- الوجه البضاوى oval:  صاحبة الوجه البيضاوى محظوظه جدا لانه بيليق عليه اى شكل من اشكال النظارات.

2- الوجه المستدير round: نختار عدسة النظارة غير مستديرة.

3- الوجه القلب heart: العدسات المناسبة هى الى بتكون نازلة لتحت شوية.

4- الوجه المربع square: نختار نظارة ذات اطار بيضاوى او دائرى ونبعد عم الاشكال المربعة.

5-الوجه الطويلoblong: بيليق عليه العدسات الدائرية.

6- الوجه الماسة diamond: بيليق عليه اى اطار بشرط لا يتعدى عظمة الوجنتين.

نصائح لنضارة الوجه

المية: لازم نشرب حوالى لتر فى اليوم والنسكافيه والشاى مش بيتحسبوا لان الكافيين بينزل اصلا المية الموجوده فى الجسم.
النوم: لازم تنامى مش أقل من 7 ساعات وفى المواعيد الطبيعية لان نوم الصبح ده مش مفيد ابدا.
الغذاء: لازم أكلك يكون فيه كل العناصر وفواكه وخضروات وابعدى على اد ما تقدرى عن الوجبات السريعة والحلويات.
التنظيف:عن طريق الروتين اليومى والاسبوعى الى اتكلمنا عنه قبل كده.
الماسكات:من افضل الماسكات الى بتساعد على نضارة البشرة(لبن-عصير             خيار-زبادى-شوفان)
تدليك البشرة:بحركات دائرية اثناء وضع الكريم المرطب للمساعدة فى تنشيط الدروة الدموية.
الرياضة: من الحاجات المهمة الى بتساعد فى تألق البشرة ونضارتها.

غسول طبيعى لتفتيح اليدين

3 معالق كبار ماء ورد - 3 معالق كبار جلسرين - 3 معالق كبار كحول نقى - 1 معلقة عصير ليمون - ا معلقة عصير برتقال (او قرص فيتاسيد فوار) - 1 معلقة خل تفاح - 8 معالق مية.
نخلطهم ونحطهم فى زجاجه او بخاخة ونحطها جمب الحوض ونستخدمها بعد كل مرة نغسل فيها ايدينا.
ولازم نحافظ عليها بأستخدام صن بلوك ونرطبها كتير ونعمل تقشير كذا مرة فى الاسبوع.

الشفايف الجافة

هنحط فازلين بطبقة كثيفة ونسيبه مثلا ساعة وبعد كده نفرك الشفايف بالراحة جدا بفرشاة اسنان ناعمه وبعد كده نغسلها وندهنها زيت زيتون او نفضى كبسولة فيتامين E وندهن بيها الشفايف.
ملحوظات هامة:
لازم تشربى مية كتير لان قلة شرب المية سبب فى جفاف الشفايف.
لازم تحطى عليها صن بلوك وترطبيها يوميا زى باقى الوجه سواء بكريم مخصص للشفايف زى Nuxe او زيت زيتون او حتى كريم مرطب عادى.
بلاش استخدام زبدة الكاكاو الرديئة او lip stick من ماركات مجهولة لان الحاجات دى هتنشف شفايفك وتغمقها.

طريقة إزالة الميك اب

طريقة إزالة الميك اب من الحاجات المهمة جدا الى لازم تعرفيها لانك لو شلتيه بطريقة غلط ممكن تأذى بشرتك ويظهرلك حبوب او بقع او اى مشكلة تانية.
1- مزيل مكياج العين (رغوى):
يوضع على قطنه ثم يوضع على كل عين دقيقة ونبدأ إزالة من جوه لبرة ثم من بره لجوه وكلما اتسخت القطنه نطبقها والكحل نشيله بقطن الودان.
2- مزيل مكياج الوجه (كريمى):
مندهموش على الوجه عشان ميمتصوش ولكن هنحط كمية كبيرة على قطنة (مش منديل) عشان بيجرح الوش ونحط على شكل نقط على الوجه كله ونبدأ نمسح براحة.
وفى الأخر نعمل الروتين اليومى العادى:غسول-تونر-ترطيب+كريم عين.

الروتين الاسبوعى لبشرة الوجه

يتكون هذا الروتين من خطوتين مهمين:
1- تنظيف البشرة بالغسول كالمعتاد ثم استخدام مقشر مناسب لنوع بشرتك او يمكنك عمل مقشر طبيعى من السكر وبعض قطرات زيت الزيتون او الليمون.
فائدة هذه الخطوة هى إزالة الجلد الميت الذى يسبب بهتان الوجه وتهيئة البشرة للخطوة التالية.
2- بعد تقشير الوجه وغسله بالماء نضع الماسك المستحب سواء للتفتيح او لتغذية البشرة وهناك انواع جاهزة واخرى طبيعية.
بعد ترك الماسك على الاكثر ثلث ساعة وغسله بالماء الفاتر نقبض المسام ونضع الكريم المرطب.
ملحوظه هامه:لازم بعد اى ماسك نرطب البشرة والا هتجف جدا ويكون الماسك مالوش اى فايدة غير انه نشف بشرتنا.

الروتين اليومى لتنظيف الوجه

بشرة الوجه تحتاج عناية خاصة حتى يظل الوجه محتفظ بنضارته ومرونته ولا يتأثر بالعوامل الخارجية, وينقسم هذا الروتين إلى ثلاث مراحل لا يجوز الإستغناء عن اى واحدة منهم:
1- تنظيف البشرة بأستخدام غسول مناسب لنوع البشرة وابتعدى عن أستخدام الصابون العادى لأنه يؤدى الى جفاف البشرة.
2- قبض المسام حتى لا تمتص الأتربة وتكون رؤوس سوداء وهذا عن طريق استخدام ماء الورد الطبيعى او استخدام Toner مناسب لنوع البشرة.
3- ترطيب البشرة وهذه خطوة مهمة جدا حتى لذوى البشرة الدهنية ولكن عليكى استخدام كريم مرطب مناسب لنوع بشرتك, واذا اهملتى هذة الخطوة ستلاحظين جفاف بشرتك وتكوين قشرة بيضاء خفيفة مما يؤدى لسرعة تكوين التجاعيد والبقع.
هذا الروتين عليكى اتباعه مرتين فى اليوم صباحا ومساءا ومرة ثالثة فى منتصف اليوم اذا احتاج الامر بعد رجوعك من العمل او الكلية.